Осы күні Ескелді ауданының «Әділетті және Прогрессивті Қазақстанның Халықтық Конституциясы үшін!» аудандық коалициясының мүшелері бір ауыздан дауыс беруге шығып, азаматтық белсенділіктің жарқын үлгісін көрсетті.
Таңертеңнен бастап аудан тұрғындары дауыс беру учаскелеріне ағылып, ел болашағына бейжай қарамайтынын дәлелдеді. Коалиция мүшелері де бұл маңызды саяси науқаннан шет қалмай, ұйымшылдықпен және жоғары жауапкершілікпен дауыс беруге қатысты. Олар үшін бұл күн – тек таңдау жасау ғана емес, сонымен қатар елдің әділетті әрі прогрессивті даму жолын қолдаудың айқын белгісі болды.
Коалиция мүшелері Қазақстанның жаңа даму кезеңіне сенім білдіріп, халықтың мүддесіне қызмет ететін конституциялық өзгерістердің маңызын атап өтті. Олардың айтуынша, халықтық Конституция – әділетті қоғам құрудың, азаматтардың құқықтары мен мүмкіндіктерін кеңейтудің берік негізі болмақ.
Ескелді ауданында дауыс беру үрдісі жоғары деңгейде ұйымдастырылып, тұрғындардың белсенділігі ерекше байқалды. Әрбір азамат өз дауысын беріп, елдің болашағына үлес қосуға мүмкіндік алды. Бұл – қоғамдағы бірлік пен ынтымақтың айқын көрінісі.
Көптен күткен 15 наурыз күні Ескелді ауданы үшін тек саяси шара ғана емес, халықтың ортақ мақсатқа жұмылғанын көрсеткен маңызды күн ретінде есте қалды. Аудан тұрғындары елдің жарқын болашағына сенім артып, әділетті және прогрессивті Қазақстан құру жолындағы қадамдарын нық басып келеді.