Кейде адам өміріндегі ең үлкен қателік бір ғана қадамнан басталады. Есірткіні «бір рет байқап көру» деген ой көп жағдайда ауыр салдарға әкеледі. Алғашында зиянсыз сияқты көрінген әрекет уақыт өте келе тәуелділікке айналып, адам өмірін түбегейлі өзгертіп жібереді.
Есірткіге тәуелділік бірден байқалмауы мүмкін. Алайда ол адамның ерік-жігерін әлсіретіп, санасын улайды. Бір рет қолданған адам қайтадан соны сезінгісі келеді, осылайша қауіпті жолға түседі. Нәтижесінде денсаулығы нашарлап, оқуына, жұмысына, отбасы мен достарына деген қарым-қатынасы бұзылады.
Көп жағдайда жастар мұндай қадамға достарының ықпалымен немесе қызығушылықтың әсерінен барады. Осындай сәттерде “жоқ” деп айта білу – үлкен батылдықтың белгісі. Әр адам өз таңдауына өзі жауапты екенін ұмытпауы керек.
Дұрыс таңдау жасау – жарқын болашақтың кепілі. Өмірде мақсат қойып, соған ұмтылған адам ешқашан зиянды жолға түспейді. Спортпен айналысу, білімге ұмтылу, пайдалы істермен айналысу – жаман әдеттерден сақтайтын ең тиімді жол.
Қорытындылай келе, бір ғана қадам бүкіл өмірді өзгертуі мүмкін. Сондықтан әр адам ойланып әрекет жасап, өз өмірін бағалай білуі керек. “Жоқ” деп айта білу – өзіңді қорғаудың ең дұрыс жолы.