Білім беру ұйымдарында қауіпсіздікті қамтамасыз ету жөніндегі шаралар ҚР Премьер-Министрі Әлихан Смайыловтың төрағалығымен өткен Үкімет отырысында қаралды.

Оқу-ағарту министрі Ғани Бейсембаев 2020 жылмен салыстырғанда республикада бейнебақылау жүйелерімен қамтамасыз етілген білім беру ұйымдарының саны 2,5 есеге, лицензияланған күзеті 7 есеге және 21 есеге, ескерту түймелері артқаны туралы баяндады. Бүгінгі таңда осы бағыттардағы жұмыс жалғасуда.

Сонымен қатар, балалардың қауіпсіздік жүйесін жетілдіру үшін білім беру ұйымдарындағы бірінші басшылардың дербес жауапкершілігін күшейту, олардағы бақылау-өткізу режимінің тәртібін айқындау, дағдарыс жағдайында қауіпсіз мінез-құлық дағдыларын қалыптастыруға баса назар аудара отырып, тәрбие жұмысын қайта форматтау және педагогтарды даярлау мен қайта даярлау бағдарламасына жаңа тақырыптық модульді енгізу жоспарлануда.

Ішкі істер министрі Марат Ахметжанов атап өткендей, елімізде білім беру объектілерін терроризмге қарсы қорғау жөніндегі Нұсқаулық бекітілген. Оның шеңберінде 300-ге дейін оқушысы бар мекемелерде бейнебақылау және құлақтандыру жүйелері болуы тиіс, ал 700 адамға дейінгі объектілерде – бейнебақылауларды жедел басқару орталықтарына (ЖБО) қосу және дабыл түймелерін орнату, 700-ден астам адамы бар және облыс орталықтарының барлық мектептерінде турникеттер мен қосымша лицензияланған күзетпен шарт болуы тиіс. Бүгінгі таңда ҚР ТЖМ-мен бірлесіп барлық білім беру ұйымдарына кешенді тексеру жүргізілуде.

Өңірлерде жүзеге асырылып жатқан шаралар туралы Солтүстік Қазақстан облысының әкімі Айдарбек Сапаров, Ақтөбе облысының әкімі Ералы Тоғжанов және Абай облысының әкімі Нұрлан Уранхаев баяндама жасады.

Премьер-Министр баяндамашыларды тыңдап, Балалардың қауіпсіздігін қамтамасыз ету    мәселесі – мемлекеттің аса маңызды міндеттерінің бірі екенін атап өтті.

«Ата-ана мектептегі баласының жағдайы мен қауіпсіздігі үшін алаңдамауы қажет», — деді Әлихан Смайылов.

 Оның айтуынша, бұл бағытта нормативтік те, ұйымдастыру жағынан да барлық деңгейде жүйелі шаралар қабылдануда. Мемлекет басшысының тапсырмасына сәйкес Балаларды қорғау жөніндегі кешенді жоспардың жобасы әзірленді. Білім беру ұйымдарын дабыл кнопкаларымен және бейнебақылау жүйелерімен жабдықтауға, оларды полиция бөлімшелеріне қосуға, лицензияланған күзетпен қамтамасыз етуге қойылатын талаптар күшейтілді.

«Білім беру ұйымдарында қауіпсіздік талаптарының сақталуына тұрақты түрде мониторинг жүргізілуі тиіс», — деді Премьер-Министр. 

Сонымен қатар атқарылған шараларға қарамастан, өңірлерде проблемалар әлі де жеткілікті. Бейнебақылау орнатылған мектептердің арасында камералары стандарттар мен техникалық талаптарға сәйкес келмейтін мектептер де бар. Еліміздегі 1100-ге жуық мектеп полицияның жедел басқару орталықтарына қосылмаған. Бақылау режимі қатаң сақталмайды. 

«Түркістан және Солтүстік Қазақстан облыстарындағы мектептерде лицензияланған күзет қызметтерімен келісімдер жасалмаған. Күзетке көбінесе арнайы даярлықтан өтпеген адамдар тартылады. Осы мәселелердің барлығын дереу шешу керек. Өйткені бұл – балаларымыздың қауіпсіздігі», — деп атап өтті Әлихан Смайылов.

Осыған байланысты Үкімет басшысы осы жылдың 1-ші сәуіріне дейін мектептерді тиісті қауіпсіздік жүйелерімен жабдықтау жұмыстарын аяқтауы қажеттігін айтты. 

«Бұл полицияның жедел басқару орталықтарына шығатын бейнебақылауға, мамандандырылған күзетпен және дабыл кнопкаларымен қамтамасыз етуге қатысты», — деп атап өтті Үкімет басшысы.

Сонымен қатар Премьер-Министр үш күн мерзімде Үкіметке балаларды қорғау жөніндегі кешенді жоспардың пысықталған жобасын енгізуді тапсырды, оған уәкілетті органдардың ведомствоаралық өзара іс-қимыл алгоритімін жетілдіру жөніндегі іс-шаралар кіруі тиіс.

Қазақстанда 12 перинаталдық орталық салынып, 32 көпбейінді аурухана жаңғыртылады  

Еліміздің ірі қалалары мен өңірлерінде халық санының өсуіне орай, перинаталдық орталықтар мен ауруханаларда орын тапшылығы байқалады. Осы орайда Үкіметте медициналық мекемелердің жетіспеушілігін толтыру мәселесі талқыланды.

Мемлекет басшысының тапсырмаларын жүзеге асыру шеңберінде 2024-2026 жылдары перинаталдық 12 орталық салу жоспарланған. Медициналық жаңа мекемелер Астана, Алматы, Шымкент, Қарағанды, Қостанай, Атырау, Жезқазған, Қызылорда, Тараз, Орал, Қаскелең қалалары мен Түркістан облысының Темірлан ауылында ашылады.

Айта кету керек, оларды жоспарлау және жобалау үшін Health planning халықаралық технологиясы қолданылды. Бұл кезеңде жер учаскелерін бағалау жүргізілді, медициналық-технологиялық тапсырма мен жобаның негіздемесі аяқталды. Өңірлерде заманауи перинаталдық орталықтарды салу балалы болуды жоспарлауға, жүктілікке және босануға, сондай-ақ босанғаннан кейінгі көмек көрсетуге байланысты медициналық қызмет түрлерін сапалы жаңа деңгейге көтереді.

Сонымен қатар «Ауылда денсаулық сақтауды жаңғырту» ұлттық жобасы аясында 2023-2024 жылдары жұмыс істеп тұрған 32 көпбейінді аудандық аурухананы жаңғырту жоспарлануда. Олар жоғары мамандандырылған КТ, МРТ, ангиографтар, ультрадыбыстық аппараттар, зертханалық, реанимациялық, рентгендік-диагностикалық, физиотерапиялық, хирургиялық және эндоскопиялық бейнеақпараттық жабдықтар және т.б. жабдықтармен қамтамасыз етілген. Барлығы 965 дана медициналық техника сатып алу жоспарланып отыр.

Сондай-ақ 2025 жылға дейін Астана, Алматы, Шымкент, Қарағанды, Ақтөбе және Семей қалаларында 6 университеттік клиника салынады, сонымен қатар инвесторлардың бастамасымен Петропавл, Түркістан және Көкшетау  қалаларында басталған жобалар аяқталады.

«Азаматтардың денсаулығы қашанда басты басымдыққа ие, ал медициналық қызметтердің сапасын арттыру Мемлекет басшысының ерекше бақылауында. Бұл тұрғыда елімізде ана мен баланың денсаулығына мұқият назар аударылып отыр. Республикада жаңа заманауи денсаулық сақтау объектілерінің ашылуы миллиондаған азаматтарға жоғары сапалы медициналық қызмет түрін алуға көмектеседі», — деп атап өтті А. Көлгінов

Т. Дүйсенова әйелдерді жұмыспен қамту және әлеуметтік қолдау шаралары туралы хабардар етті

ҚР Еңбек және халықты әлеуметтік қорғау министрі Тамара Дүйсенова Үкімет отырысында Қазақстанда әйелдерді жұмыспен қамту және әлеуметтік қолдау бойынша жүзеге асырылып жатқан шаралар туралы айтып берді.

ЕХӘҚМ басшысы сөз басында республикада 4,3 млн жұмыспен қамтылған әйел бар екенін, бұл жұмыспен қамтылған халықтың жалпы санының 48% — ын құрайтынын атап өтті. Әйелдердің 35% — ы сауда және қызмет көрсету саласында, 32% — ы білім, денсаулық сақтау және ғылым саласында, 14% — ы өнеркәсіпте, құрылыста және көлікте, 9% — дан астамы ауыл шаруашылығында жұмыс істейді.

«Өңірлік жұмыспен қамту карталары аясында әйелдерді нәтижелі жұмыспен қамтуға тарту бойынша белсенді жұмыс жүргізілді. Мәселен, 536 мың әйел адам жұмысқа орналастырылды, бұл барлық жұмысқа орналастырылған азаматтардың 55% — ын құрады. Ал ағымдағы жылдың екі айында бұл көрсеткіш 92 мыңнан асты», – деді Тамара Дүйсенова.

Министр жас әйелдердің мемлекет субсидиялайтын жұмыс орындарына жұмысқа орналасу кезінде белсенділігі жоғары екенін айтты. Өткен жылы 30 мыңға жуық қыздар алғаш рет жұмысқа орналасты.

«Мемлекеттік қолдаудың тағы бір маңызды шарасы — содан кейін жұмысқа орналасу немесе өз ісін ашуға апаратын оқыту, Өткен жылы 80 мыңға жуық әйел кәсіпкерлік негіздері бойынша курстардан өтті. Оқыту қорытындысы бойынша 13 мыңға жуық әйел грант алды. Оның 58% — ы тауарлар мен қызметтерді өндіруге қажетті технологиялық жабдықтар мен мүкәммал сатып алды, ал 31% — ы мал шаруашылығымен айналысып, мал сатып алды», – деді ЕХӘҚМ басшысы.

Әйелдер бизнесті құрудың сәтті мысалдары ретінде Тамара Дүйсенова кондитерлік цех ашқан Қызылорда облысы Шиелі ауданының көпбалалы анасы Гүлзия Мұратбекқызының және гипс пен резеңкеден жасалған бұйымдар шығарумен айналысқан Ақтөбе облысының тұрғыны Ақманат Жолаушыбаеваның жобалары туралы айтып берді.

Министр сондай-ақ өткен жылы зейнеткерлік жасқа дейінгі адамдар үшін «Күміс жас» жобасы іске қосылғанын, оның шеңберінде 3 мыңнан астам адам жұмысқа орналастырылғанын, оның 50% — ын әйелдер құрайтынын атап өтті. Жоба қатысушылары оны сәтті деп санайды. Мәселен, Шығыс Қазақстан облысының Шемонаиха қаласынан Тамара Стрельникова кіші медбике ретінде жұмыс тапты, ал Қарағанды облысының Осакаровка ауылынан Татьяна Адамович кондитер болды.

Биыл жобаға қатысу жасы 58 жастан 50 жасқа дейін төмендеді. Жұмыс орындарын жұмыс берушілер ұсынады, қатысушылар өз біліктіліктеріне қарай өз бетінше таңдауға құқылы. Жалақыны мемлекет 3 жыл ішінде субсидиялайды.

«Биылғы жылы әйелдерді жұмыспен қамтуға жәрдемдесу жөніндегі шараларды жандандыру бойынша жұмыстар жалғастырылатын болады. Осы мақсатта тек бюджеттен 177 млрд теңгеден астам қаржы бөлінді, оның ішінде субсидияланатын жұмыс орындарына 135 млрд теңге және несиелер мен гранттар беруге 42 млрд теңге», – деп атап өтті Тамара Дүйсенова.

Министр сондай-ақ биыл ана мен баланы қолдау жөніндегі шаралармен 2,1 млн отбасы қамтылатынын, оларға мемлекеттік бюджет және Мемлекеттік әлеуметтік сақтандыру қорының (бұдан әрі-МӘСҚ) қаражаты есебінен 1,2 трлн теңге бағытталатынын хабарлады.

«Ағымдағы жылы жүктілік және босану бойынша МӘСҚ-дан әлеуметтік төлемдерді 258 мыңнан астам әйел алады. Әйелдердің табысына байланысты олардың орташа мөлшері 2 айдың қорытындысы бойынша шамамен 900 мың теңгені құрады.

1 қаңтардан бастап бала тууға арналған біржолғы жәрдемақылардың мөлшері ұлғайтылды. А.ж. бірінші, екінші және үшінші бала туылған кезде отбасы 131 мың теңге, ал төртінші және 217 мың теңгеден астам алады.

Мемлекет Басшысының тапсырмаларын орындау үшін бала күтімі бойынша әлеуметтік төлемдерді жүзеге асыру кезеңі 1 жастан 1,5 жасқа дейін ұлғайтылды. Өткен жылы туылған балаларды ескере отырып, мұндай төлемдерді 760 мыңға жуық отбасы алады», – деді ЕХӘҚМ басшысы.

Тамара Дүйсенова бұл қызметтердің барлығы алушыларға белсенді түрде, яғни мемлекеттік органдарға жүгінбей-ақ ұсынылатынын айтты. Бүгінгі таңда Отбасының цифрлық картасын қоса алғанда, осы форматта ұсынылған әлеуметтік-еңбек саласындағы мемлекеттік көрсетілетін қызметтер саны 1 млн болды.

ЕХӘҚМ басшысы көп балалы аналарды қолдау шараларына ерекше назар аударды. Төрт баласы бар отбасына төленетін ай сайынғы жәрдемақының ең төменгі мөлшері 55 мың теңгеден сәл асады, ал 8 және одан да көп баласы бар отбасылар үшін ең жоғары мөлшері 110 мың теңгеден асады. Биыл жәрдемақының бұл түрін жалпы қаржыландыру көлемі 410 млрд теңгеге 544 мың отбасына төлеу жоспарлануда.

Алтын алқа және Күміс алқа алқаларымен марапатталған аналарға тағы бір жәрдемақы қарастырылған. Ол өмір бойы тағайындалады және ай сайын төленеді. Бүгінде бұл жәрдемақыны 230 мың ана алады және олар үшін республикалық бюджеттен 61 млрд теңге қарастырылған.

«Жоғарыда көрсетілген барлық әлеуметтік төлемдер отбасының табысына қарамастан тағайындалатынын атап өткім келді. Бірақ отбасының әрбір мүшесіне шаққандағы табысы белгіленген кедейлік шегінен төмен болған жағдайда, мемлекет қосымша атаулы әлеуметтік көмек көрсететін болады. Өткен жылы оны 729 мың адам алды, биыл ол 350 мың адамға тағайындалды, бұл ретте оның орташа мөлшері ағымдағы жылы тіркелген төлемдерді ескере отырып, 18 мың теңгені немесе өткен жылдың деңгейінен 8,7 мыңға артық», – деп түйіндеді сөзін Министр.